Men qaıtsem eken?

Mynaý denem órtenip, barady ysyp.

Ketsem be álde sandalyp araq iship?..

Menen góri baqytty-aý árkimderdiń

ıtaıaǵyn jalaǵan qara kúshik.

Sensiz ómir ómir me? Qurysyn bári!

Ólgen artyq munan da dala qushyp.

Álde seniń yzańnan

qyz bitkenniń barlyǵyn qorlasam ba?

Shashsam ba eken ómirdi ońǵa-solǵa?

Baq qusymdy basqadan izdesem be,

baǵyma sen bulbul bop qonbasań da?

Bireýlerge bir kúndik baqyt bolyp,

bireýlerge qaıǵy bop ornasam ba?

Mynaý qyrsyq dúnıe basar ma eken

qısyq ketken aıaǵyn ońǵa sonda?..