Kenesary hannyń patshalyq ekspansıaǵa qarsy kúresken joryqtaryn kópshilik jaqsy biledi. Múrdesi qyrǵyz jerinde dep, basy ózi kúresken patshalyq eldiń bir qýysynda dep tarıhty topshylaıtynymyz belgili. Osy kúresti jolǵa jan aıamaı dem bergen bir tulǵan Han Keneniń týǵan qaryndasy Bopaı hansha.

Abylaıdyń uly Qasymnyń báıbishesi Aıkúmisten alty bala taraıdy. Kenesary, Sarjan, Esengeldi, Kóshek, Aǵataı jáne Bopaı. Bopaı boıjetken shaǵynda Ábilqaıyrdyń Sámeke degen ulyna uzatylady. Sámeke ekeýiniń shańyraǵynan alty ul ómirge keledi. Keıin alty ul erjetip, anasymen birge atqa qonyp, Kenesarynyń sarbazdarynyń qataryna attandy. Bopaı hanshany tarıhı derekter de, İlıas Esenberlınniń «Qahar» romany da batyl, erjúrek, kúres jolyndaǵy taqymynyń tekke qysylmaǵanyn dáleldep jazady. Áskerge qajetti alym-salyqtardy jınaýdy Kenesary qaryndasy Bopaıǵa senip tapsyrǵan. Ol osy áskerdi turaqty ustap turýǵa qajetti dúnıelerin túgendeıtin 600 sarbazdan turatyn jasaqty basqarǵan. Kenesary han taǵdyrynyń qaıǵyly aıaqtalýymen, en dalany dúbirletip ótken joryqtardan búginde tek qana ańyzdar ǵana sol erlikterdiń shejiresinen syr shertetindeı.

Osynaý aty ańyzǵa aınalaǵan qazaqtyń qyzynyń esimi urpaq jadyna ulttyq patrıotızmniń jarqyn úlgisi bolyp tuurady. Sońǵy jyldary Rýhanı jańǵyrý baǵdarlamasy aıasynda tarıhty túgendep, tulǵalary tirilmese de, erlik joldaryn jańasha nasıhattaý maqsatynda «Qazaqstannyń kıeli jerleri geografıasyna» jobasy qolǵa alynyp júr. Aqtóbe oblysy boıynsha «Qazaqstannyń kıeli jerleri geografıasyna» respýblıkalyq deńgeıde engizilgen 10 nysannyń qataryna Kenesary hannyń qaryndasy Bopaı hanym jerlengen qorymy da engizildi. Bul tarıhı mekenniń ornalasqan aýmaǵy Aqtóbe oblysy, Áıteke bı aýdany, Kilemjaıǵan aýylynan soltústik-batysqa qaraı 15 km jerde. Jer ataýy da hanshanyń atymen Bopaı atalady. Jer ataýlary sóılesin.