Qazaqstanda zeınetaqy tóleý tártibi ózgerýi múmkin

Birjan Nurymbetovtiń aıtýynsha, eńbek ótili bes jyldan az qazaqstandyqtarǵa kúnkóris mınımýmynyń 70 prosenti shamasynda eń tómengi kepildendirilgen zeınetaqy tóleý usynylǵan.

Eńbek jáne halyqty áleýmettik qorǵaý mınıstrligi 2028 jyldan bastap kepildendirilgen eń tómengi zeınetaqyny engizýdi usynyp otyr. Bul usynys zeınetaqy júıesin jańǵyrtý tujyrymdamasynda jazylǵan, dep habarlaıdy Sputnik Qazaqstan.

Еңбек және халықты әлеуметтік қорғау министрлігі Біржан Нұрымбетов

"Biz 2028 jyldan Qazaqstanda kepildendirilgen eń tómengi zeınetaqy engizýdi usyndyq. Ol qazirgi bazalyq zeınetaqy tólemin almastyrady", - dedi eńbek jáne halyqty áleýmettik qorǵaý mınıstri Birjan Nurymbetov úkimette ótken baspasóz máslıhatynda.

Mınıstrlik eńbek ótili bes jyldan az azamattarǵa eń tómengi kúnkóris sheginiń 70 prosenti shamasynda kepildendirilgen zeınetaqy tóleýdi josparlap otyr. Keıin onyń mólsheri 1,5 eń tómengi kúnkóris shegine deıin ósedi. 

"Bul eńbek mınıstrliginiń usynystary. Memleket tarapynan kepildendirilgen tólem jınaqtaýshy zeınetaqymen qosa eseptegende, zeınetkerdiń joǵaltqan tabysynyń kem degende 40 prosentin óteıdi. Barlyq esepteý osy maqsatpen júrgizildi", - dedi vedomstvo basshysy.

Nurymbetov kepildendirilgen eń tómengi zeınetaqyny engizý nege mańyzdy ekenin aıtty.

"1998 jyldan bastap biz jınaqtaýshy zeınetaqy júıesine kóshtik. Búginde memleket tóleıtin yntymaqty nemese eńbek zeınetaqysyn 1998 jyldyń qańtaryna deıin kem degende 6 aı jumys istegen azamattar alady. Mundaı adamdardyń sany jyldan-jylǵa azaıyp barady. Qazir 1957 jyly týǵan er adamdar zeınetke shyǵyp jatyr, olardyń talap etiletin tolyq eńbek ótili joq, sáıkesinshe, tolyq zeınetaqysy da joq. Birtindep yntymaqty zeınetaqy joǵalady. Sol sebepti 2043 jyly teorııalyq turǵydan memleketten taǵaıyndalatyn eńbek zeınetaqysyn alatyn jańa adamdar bolmaıdy. Tek bazalyq zeınetaqy qalady", - dep túsindirdi ol.

Qazaqstanda zeınetaqy qalaı esepteledi

Búginde elimizde zeınetaqy úsh deńgeıden quralady:

Bazalyq zeınetaqy

Yntymaqty nemese eńbek zeınetaqysy (1998 jyldyń 1 qańtaryna deıingi eńbek ótiline baılanysty)

Jınaqtaýshy zeınetaqy (1998 jyldyń 1 qańtarynan keıin qorǵa aýdarylyp otyrǵan jarna esebinen)

2018 jyldyń shildesinen bastap bazalyq zeınetaqy azamattardyń eńbek ótili men zeınetaqy júıesine qatysý uzaqtyǵyna táýeldi.

Eger zeınetkerdiń eńbek ótili 10 jyl nemese odan kem, ne múlde bolmasa oǵan eń tómengi kúnkóris deńgeıiniń 54% tólenedi. Iаǵnı 10 jylǵa deıin – bul kepildendirilgen kólem. Qazaqstanda bazalyq zeınetaqyny bul somadan tómen eshkim almaıdy. Al eger eńbek ótili 10 jyldan assa, onda taǵy 2% ústeme qosylady. Máselen, 11 jyl eńbek ótili barlar tómengi kúnkóris deńgeıiniń 56%-in alatyn bolady. Al eńbek ótili 33 jyl nemese odan da kóp azamattarǵa eń tómengi kúnkóris deńgeıiniń joǵary mólsheri – 100% tólenedi.


2020 jyly eń tómengi bazalyq zeınetaqy 800 teńgege ulǵaıyp, 16 839 teńgeni qurady.


Al eń tómengi kúnkóris deńgeıi –  31 183 teńge.


Yntymaqty júıede 1998 jyldyń 1 qańtaryna deıingi eńbek ótili esepteledi jáne ol eńbek ótili men jalaqyǵa táýeldi bolady.


Jınaqtaýshy zeınetaqy


Ár jumys berýshi qyzmetkerdiń aı saıynǵy tabysynyń 10%-yn mindetti zeınetaqy jarnasy retinde turaqty túrde aýdaryp otyrady. Aqsha jumysshynyń Biryńǵaı jınaqtaýshy zeınetaqy qorynda ashylǵan jeke zeınetaqy shotyna aýdarylady.

Жарнама орны

Múmkin sizdi qyzyqtyratyn taqyryptar:

  • Jambylǵa Saparbaevtyń artynan taǵy kimder kele jatyr?
  • Toqaev Qazaqstannyń syrtqy saıası basymdyqtaryn atap kórsetti
  • Abaev: «Bılik kinálilerdi «qazaq», «dúngen» dep bólmeıdi»
  • Sengen sotym sen bolsań...
  • Elbasy: "Qordaıdaǵy oqıǵada quqyq qorǵaý organdary jibergen qatelikter bar"