«27 tamyzda otstavkaǵa ótinish jazdym», – dep ózi rastady aqparatty shahar basshysy. Endi Tekeli qalasy ákiminiń aldaǵy taǵdyry qalaı bolatynyn Almaty oblysynyń ákimi sheshedi. Amandyq Batalov bir aıdyń ishinde Prezıdent Ákimshiliginiń kelisimimen otstavkany qabyldaıdy nemese qabyldamaıdy.

Aıta keteıik, buǵan deıin Tekeli qalasynyń turǵyndary áleýmettik jelige shyǵyp, ákimderin jumystan shyǵarmaýdy ótinip suraǵan bolatyn.

Halyqtyń sózinshe, B.Ónerbaev Tekelige ákim bolyp kelgeli qurylys jandanyp, baspanasyzdar úıli bolyp, kósheler jóndelip, kóp jumys atqaryla bastaǵan.

Esterińizge sala keteıik, Tekeli qalasy ákiminiń aparat basshysy 1,5 mln teńge paramen ustalyp, qylmysy dáleldengen bolatyn. 1978 jylǵy sheneýnik endi alǵan parasyn on ese qylyp memleketke qaıtaryp, ómir boıyna memlekettik qyzmette jumys isteý quqyǵynan aıyryldy. Sot oǵan 15 mln teńge aıyppul saldy. Alǵashqy eńbek jolyn qarapaıym kúzetshi bolyp bastaǵan Tekeli qalasy ákiminiń aparat basshysy paramen ustalǵanda aǵyny kúshti sýǵa sekirip, óz ómirine qaýip tóndirip qashqan bolatyn. Zań boıynsha qolastyndaǵy memlekettik qyzmetker paramen ustalsa, onyń basshysy qyzmetinen ketýi tıis.