Elbasy Nursultan Nazarbaev Baýyrjan Baıbekti qabyldady. Kezdesý barysynda «Nur Otan» partııasynyń tóraǵasy 100 myń áleýmettik osal otbasyna 50 myń teńgeden qosymsha ataýly tólemder uıymdastyrýdy pysyqtaýdy tapsyrdy.

Kezdesý barysynda eń aldymen praımerızdi ótkizý qorytyndysy talqylandy.

Partııa tóraǵasynyń birinshi orynbasarynyń aqparatyna sáıkes, partııa músheleriniń 84,2 paıyzy daýys berýge qatysqan, onyń 88 paıyzy - onlaın formatta. Tirkelgen 10 073 úmitkerdiń 36 paıyzdan astamy - áıelder, 29 paıyzy - 35 jasqa deıingi jastar. Partııaishilik irikteý qorytyndysy boıynsha 20 myńnan astam usynys, onyń ishinde turǵyn úı qatynastary jáne TKSh, ınfraqurylym jáne kólik, bilim berý jáne densaýlyq saqtaý salalarynda jınaldy.

Nursultan Nazarbaev praımerız naqty áleýmettik lıftke aınalǵanyn, bul partııalyq qatarlardy jańartýǵa, sonymen qatar qajetti sabaqtastyqty saqtaýǵa múmkindik bergenin atap ótti.

- "Bul partııanyń aýqymdy is-sharasy boldy, oǵan kóptegen adamdar qatysty. Biz ony alǵash ret ótkizdik. Partııanyń nazaryn talap etetin kóptegen tilekter men suraqtar aıtyldy. Nur Otan - naqty ister partııasy. Biz qabyldaǵannyń bári mindetti túrde oryndalýy tıis", - dedi elbasy.

Sonymen qatar, Qazaqstannyń tuńǵysh prezıdenti partııanyń saılaýaldy baǵdarlamasynyń jobasyna jeke toqtaldy.

- "Saıası keńes bıýrosynda biz respýblıkalyq saılaýaldy baǵdarlamanyń jobasyn talqyladyq. Baǵdarlamada kúrdeli jaǵdaıdy eskere otyryp, bizdiń maqsattarymyz ben aýqymdy mindetterimiz qoıylǵan. Partııanyń barlyq músheleri osyǵan baǵdarlanady, óıtkeni munyń bári halyqtyń ál-aýqatyna baǵyttalǵan. Bizdiń barlyq saılaýaldy ýádelerimiz eseptelýi tıis", - dedi partııa tóraǵasy.

Kezdesý barysynda elbasy partııaǵa Birgemiz qorymen birlesip, búkil el boıynsha taǵy 100 myń áleýmettik osal otbasyna 50 myń teńgeden qosymsha ataýly tólemder uıymdastyrýdy pysyqtaýdy tapsyrdy.

- "Partııanyń ortalyq apparaty men aktıvimiz úlken jumys atqardy. Men olardyń qajyrly eńbegiúshin bárine rızamyn. Alda áli naqty ister kóp. El ıgiligi úshin jumysty jalǵastyrý mańyzdy", - dep túıindedi Qazaqstannyń tuńǵysh prezıdenti.