2 qarashada QR Premer-Mınıstri Asqar Mamınniń tóraǵalyǵymen QR aýmaǵynda koronavırýs ınfeksııasynyń taralýyna jol bermeý jónindegi vedomstvoaralyq komıssııanyń (VAK) selektorlyq otyrysy ótti.

Sanıtarlyq-epıdemıologııalyq ahýal jáne COVID-19-dyń ekinshi tolqynyna daıyndyq týraly densaýlyq saqtaý mınıstri A. Soı, jeke qorǵanysh quraldarynyń baǵa saıasatyn monıtorıngileý jumysy týraly Básekelestikti qorǵaý jáne damytý agenttiginiń tóraǵasy S. Jumanǵarın, sanıtarlyq talaptardyń saqtalýyn baqylaý týraly ishki ister mınıstri E. Turǵymbaev, óńirlerdegi ahýal týraly Aqmola oblysynyń ákimi E. Marjyqpaev, Soltústik Qazaqstan oblysynyń ákimi Q. Aqsaqalov, Pavlodar oblysynyń ákimi Á. Sqaqov, Shyǵys Qazaqstan oblysy ákiminiń orynbasary Sh. Buqtuǵutov baıandady.

Bıylǵy 2 qarashadaǵy jaǵdaı boıynsha QR kóptegen óńirinde syrqattanýshylyqtyń ósýi baıqalady. Osy jylǵy 5-18 qazan aralyǵynda elimizde vırýsty juqtyrǵan 1272 adam anyqtaldy, 19 qazan men 1 qarasha aralyǵynda – 3352 adam. Táýligine 442 adam aýyryp qaldy. Ósý qarqyny 0,4%-dy, reprodýktıvtilik kórsetkishi 1,4-ti quraıdy. Infeksııalyq tósek oryndary 22%-ǵa, reanımasııalyq oryndar 18%-ǵa júktelgen.

Bir aı ishinde syrqattanýshylyq deńgeıiniń eń joǵary ósimi Shyǵys Qazaqstan, Aqmola, Qostanaı, Batys Qazaqstan, Pavlodar oblystarynda baıqalady.

Úkimet basshysy bıznes sýbektileri men halyqtyń shekteý sharalary men karantın rejımin saqtaýyn baqylaý jónindegi monıtorıngtik toptar qyzmetiniń tıimdiligin arttyrýdy tapsyrdy.

Premer-Mınıstr barlyq óńirler turaqtandyrý qorlaryn Densaýlyq saqtaý mınıstrliginiń normatıvterine deıin jetkizý boıynsha alǵa qoıylǵan mindetti oryndaǵanyn atap ótti.

Úkimet basshysy emhanalardy, stasıonarlardy, jedel járdem qyzmetterin qajetti jabdyqpen tolyqtyrýdy jalǵastyrýdy tapsyrdy.

Sıfrlandyrý jáne densaýlyq saqtaý mınıstrlikterine aýrýdy juqtyrǵandarmen baılanysta bolǵan adamdardy, naýqastardy qadaǵalaý, sanıtarııalyq talaptardyń saqtalýyna monıtorıng jasaý jónindegi baǵdarlamalardy ázirlep, engizýdi jedeldetý, Indýstrııa mınıstrligine óńirlerge rentgen apparattaryn, jedel járdem avtokólikterin jetkizýdi jyldamdatý, ákimdikterge olardy qabyldaýdy tezdetý tapsyryldy.

VAK birqatar sheshim qabyldady:

I. Myna azamattar úshin Memlekettik shekarany kesip ótý tártibine ózgerister engizý:

QR aýmaǵynda turýǵa yqtııarhaty bar sheteldikter, olardyń otbasy músheleri úshin;

QR azamattarynyń otbasy músheleri bolyp tabylatyn sheteldikter úshin.

Atalǵan sanattaǵy tulǵalar QR Memlekettik shekarasyn 90 táýlikte 1 retten artyq kesip óte almaıdy (buǵan deıin 30 táýlik bolǵan).

II. Vızasyz rejım boıynsha 57 eldiń azamattary úshin vızasyz rejımdi toqtata turýdy 2021 jylǵy 1 mamyrǵa deıin uzartý.

QHR men Úndistannan keletin tranzıttik jolaýshylardyń QR aýmaǵynda 72 saǵat vızasyz bolýyn toqtata turýdy 2021 jylǵy 1 qańtarǵa deıin uzartý.

III. Túrkııamen áýe reısteri boıynsha 2020 jylǵy 9 qarashadan bastap Túrkııamen halyqaralyq áýe reısteriniń sanyn aptasyna 33-ten 20-ǵa deıin qysqartý.