Qazaqstannyń 8 bankine 47 mıllıon teńge ákimshilik aıyppul salyndy. Bul jaıynda Finprom.kz habarlady.

Basylymnyń habarlaýynsha, 2020 jyldyń mamyr aıynyń sońyna deıin Qazaqstanda bank sektoryndaǵy qyzmetti ekinshi deńgeıli 27 bank usyndy. Onyń ishinde14 sheteldik bank bar. Eldegi ekinshi deńgeıli bankter aktıviniń jalpy somasy bir jylda 13%-ke artyp, 28,2 trıllıon teńgeni qurady.

"Aktıvterdiń jáne basqa da kóptegen qarjylyq kórsetkishterdiń ósýine qaramastan, 2020 jyldyń birinshi jartyjyldyǵynda bankterde qarjylyq qyzmetterdi tutynýshylardyń quqyqtaryn qorǵaýǵa qatysty 87 yqpal etý sharalary qoldanyldy. Onyń ishinde ákimshilik aıyppuldar, qadaǵalap den qoıýdyń usynymdyq sharalary, jazbasha uıǵarymdar bar",– delingen aqparatta.

Bankter kóp jaǵdaıda Qazaqstan Respýblıkasynyń bank zańnamasynda, sondaı-aq Qazaqstan ulttyq bankiniń normatıvtik quqyqtyq aktilerinde belgilengen normalardy saqtamaǵan. Onyń ishinde banktik qaryzǵa qyzmet kórsetý, tólemder men aqsha aýdarymdary, banktik shottarǵa qyzmet kórsetýdi oryndaýda belgilengen normalar saqtalmaǵan.

Osylaısha, ekinshi deńgeıli segiz bankke ákimshilik aıyppul salyndy. 2020 jyldyń birinshi jartyjyldyǵynda bankterge qatysty ákimshilik aıyppuldardyń jalpy somasy 47,6 mıllıon teńgeni qurady.

Ákimshilik aıyppuldyń eń kóp somasy – 21,9 mıllıon teńge Asia Credit Bank-ke salynǵan, sondaı-aq, Reseı Sberbankine 11,1 mıllıon teńge, Capital Bank Kazakhstan-ǵa 7,8 mıllıon teńge aıyppul salyndy. Tengri Bank 4,2 mıllıon teńge, Álfa bank 1,1 mıllıon teńge tóleıdi.Bankter "tólemder jáne tólem júıeleri týraly" QR zańynda belgilengen aqsha tólemi jáne aýdarymy jónindegi nusqaýdy oryndaý merzimin buzý, Qylmystyq jolmen alynǵan kiristerdi zańdastyrýǵa (jylystyrýǵa) jáne terorızmdi qarjylandyrýǵa qarsy is-qımyl týraly qarjy monıtorıńine jatatyn operasıalar týraly aqparatty qujattyq tirkeý, saqtaý jáne berý boıynsha zańnamany buzýǵa jol bergen.