Taıaýda Pentagon Qytaı óziniń ıadrolyq arsenalyn kóbeıtýdi josparlap otyrǵanyn málimdedi. Eki el arasyndaǵy daǵdarys resmı Beıjińdi osyndaı qadam jasaýǵa ıtermelep otyrǵan tárizdi.

Ótken aptada Pentagon AQSh Kongresinde jyl­dyq baıandama jasap, Qytaıdyń ıadrolyq arsenalyn­daǵy qarý sany 200-ge jetpeıtinin málim etti. Biraq bul eldegi ıadrolyq qarý sany áldeqaıda kóp bolýy yqtımal. AQSH-tyń shendi ofıserleri bul eldegi shıkizat qory ıadrolyq arsenal sanyn eki eseleýge jetedi dep esepteıdi. Sondaı-aq oqtumsyqtardy jerden de, sýdan da, áýeden de atýǵa kúsh salmaq. Pentagonnyń da dabyl qaǵyp otyrǵany osy. Jyl basynda «Global Times» gazeti Beıjiń bıligi jaqyn arada oqtumsyqtar sanyn myńǵa kóbeı­týge ázir dep aqparat tarat­qan-dy. Sonymen qatar áýe-sý-jer úshtigine de basymdyq berýdi kózdeıdi. Búginde jerden jáne sýdan balıstıkalyq zymy­ran ushyrýǵa qabiletti. En­digi jetpeı turǵany – áýe arqy­ly balıs­tıkalyq raketa jibe­rý. Degen­men byltyrǵy qazan aıynda Qytaı bıligi H-6N bomba tasyǵysh zymyranyn tanystyr­ǵan bolatyn.

Keler jylǵy aqpanda «The New START» dep atalatyn st­ra­tegıalyq shabýyldaý baǵy­tynda qarýlanýdy boldyrmaý jónindegi Reseı men AQSh arasyndaǵy kelisimniń merzimi aıaqtalady. Esterińizge sala keteıik, «The New START» shartyna 2010 jyly osy eki eldiń sol kezdegi basshylary Barak Obama men Dmıtrı Medvedev qol qoıǵan edi. Soǵan sáıkes, oqtumsyqtar sany 1550-ge deıin, qurlyqaralyq balıstıkalyq zymyrandar, súńgýir qaıyqtardaǵy balıstıkalyq zymyrandar jáne aýyr bombalaýshylar sany 700 danaǵa deıin qysqartylýy tıis.

Al Qytaı negizi ıadrolyq qarýdy taratpaý jónindegi eshqandaı kelisimge múshe emes. Osyǵan baılanysty resmı Vashıngton AQSh pen Reseı arasyndaǵy ıadrolyq qarýǵa qatysty kelisimge Qytaıdy da kirgizýdi kózdeıdi. Áıtse de, srapshylardyń pikirinshe mundaıǵa Sı Szınpın ákimshiliginiń kónýi ekitalaı. Degen­men, komýnıstik partıa ókiliniń biri suhbattarynyń birinde AQSh oqtumsyqtar sanyn edáýir qys­qartsa ǵana Beıjiń bıligi kelisim ústeline otyrýy múmkin degen syńaıda áńgime aıtqan.

Pentagon bekerge qaýiptenip otyrǵan joq. Taıaýda Qytaı basshysy Sı Szınpın ulttyq qorǵanys pen qarýly kúshterdi jań­ǵyrtýǵa jáne damytýǵa basym­dyq bere­tinin málimdegen. Onyń aıtýynsha, qytaı­lyq kelbetti saqtap, ulttyq qun­dylyqty nyǵaıtý úshin damýmen birge qorǵanys salasyna da kóńil bólinýi tıis. Sondyqtan memlekettiń keleshegin aıqyn­daý maqsatynda ásker salasyn kúsheıtpek. Iaǵnı jańa baǵytqa qadam basyp, áskerin álemdik deń­geıge shyǵarýǵa kúsh salmaq. Al­daǵy jospar boıynsha ulttyq qorǵanys pen qarýly kúshterdi damytýǵa baǵyttalǵan jańa strategıa 14 jylǵa arnalǵan. Osy baǵdarlama aıasynda kásibı ásker qurýǵa basymdyq beriledi.

AQSH-ta qarap otyrǵan joq. The Washington Post gazeti AQSh pre­zıdenti Donald Tramp Neva­dadaǵy ıadrolyq synaq alańyn qaıta jan­dandyrýǵa nıetti ekenin jet­­kizgen. Sondaı-aq, AQSh pre­zı­dentiniń qarýlaný jónindegi ar­naıy ókili Marshal Bıllıngslı el­diń qar­sylastaryn kez kelgen sátte tuqyrtyp, atom bombasyn tastaýǵa ázir ekenin málimdedi. Aqparat quraldarynyń málimetine qaraǵanda, keler jyly Aq úı ıadrolyq qarýǵa arnalǵan búdjet qarjysyn 37,3 mlrd dollardan 44,5 mlrd dollarǵa kóbeıtýdi jos­parlap otyr.