Búgingi tańda Túrkistan oblysynda epıdemıologıalyq jaǵdaı turaqty. Degenmen, óńirdiń barlyq medısınalyq mekemelerinde koronavırýstyq ınfeksıamen kúres jumystary bekitilip, ekinshi tolqynyna daıyndyq jumystary júrgizilýde. İndettiń órshýi oryn ala qalǵan jaǵdaıda medısına qyzmetkerleri daıyn bolýy tıis.

Qoǵamdyq densaýlyq basqarmasynyń málimetinshe, bul maqsatta jergilikti búdjet pen gýmanıtarlyq kómek arqyly 800-ge jýyq ottegi konsentraty alynǵan. Qarqyndy terapıa palatalary bir jarym myńǵa jýyq ottegi núktelerimen jasaqtalǵan. 

Epıdemıologıalyq jaǵdaı eskerile otyryp, oblystyń medısınalyq uıymdary men «SK-Farmasıa» JSHS-i arasynda dárilik zattar men medısınalyq buıymdardy jetkizip berýge qosymsha kelisimsharttar jasalynǵan. Mamandar qazirdiń ózinde eki aıǵa jetetin qosymsha jeke qorǵanys quraldarymen qamtamasyz etilgen. 

Oblysta jalpy koronavırýs ınfeksıasyna táýliktik qýattylyǵy úsh myńǵa jýyq synamany quraıtyn 12 zerthana jumys isteýde. Osy ýaqytqa deıin 130 myńnan astam adam test tapsyrǵan. Onyń 3343 jaǵdaıynda Covid-19 ınfeksıasy rastalyp, 3210 adam jazylyp shyqty. Búginge bir kúndik ósim 0,1 paıyzdy qurap, aýrýshańdyqtyń tómendegeni baıqalady. Oblys boıynsha ınfeksıalyq stasıonarlarda búgingi tańda koronavırýsqa qarsy emdeý sharalary úshin 600 tósek-oryn daıyndalǵan. Sonymen qatar, Túrkistan qalasynda 200 orynǵa eseptelgen modýldi juqpaly aýrýlar aýrýhanasy salynýda. Koronavırýs jáne pnevmonıa indetterimen kúresý maqsatynda alǵashqy medısınalyq-sanıtarlyq kómek kórsetetin uıymdarda quramynda dáriger men orta býyn medısına qyzmetkerleri jumyldyrylǵan 380 mobıldi  top jumys isteýde. Sondaı-aq, medısınalyq uıymdarda ashylǵan 20 Call-ortalyqtary turǵyndar tarapynan týyndaǵan suraqtarǵa jaýap berip, ózekti másleler boıynsha túsindirý jumystaryn júrgizýde.